Poslovne vesti - Makedonija

Тутунарите бараат нови повисоки откупни цени

Повисоки откупни цени за тутунот бараат членовите на новоформираниот Сојуз на тутунски здруженија во Прилеп во кој членуваат 14 здруженија, а ќе дејствува преку Федерацијата на фармери на Македонија.

Претседателот Сашо Јорданоски смета дека е потребна нова рамка со која ќе се утврдат откупните цени на тутунот пред почетокот на производствената сезона.

- Бараме цените да не се со големи разлики, односно цената на првата класа да биде 240 денари, на втората 192 и на третата 144. Со овие цени производството на тутун ќе биде исплатливо - вели Јорданоски.

Инаку, пред почетокот на новата производствена сезона на тутунот во прилепско-пелагонискиот регион, министерот за земјоделство, Љупчо Димовски, обелодени дека се откупени околу 14 илјади тони тутун со просечна откупна цена од 170 денари за килограм, а во цела Македонија над 20 илјади тони. Тој го оцени за успешен раниот откуп во септември при што се презеде дел од производството.

- Тутунарите инкасираат над 55 милиони евра, заедно со претстојната субвенција од 60 денари за килограм. Очекуваме зголемен интерес за тутунопроизводство за околу 15 отсто поради зголемените цени, а и поради раниот откуп во септември во картонски кутии. Откупните компании најавуваат продолжување на започнатата практика на предвремен откуп, што ја олеснува понатамошната преработка - вели Димовски.

- Повеќе од третина од тутунот е трета класа, а откупувачите даваат зголемување на цената од 20 до 25 денари за првата класа. Мало е ревидирањето кај другите категории. Третата класа треба да не биде под 140 денари, а тие нудат првата класа да биде 240 денари, втората 172, а третата 125 денари. Наместо ќар, ќе „береме“ загуби поради поскапата нафта - вели Данчо Милески, претседател на Сојузот на тутунски здруженија од Прилеп.